السياسة مش عركة ف فرح
واحد يسب الدين وتاني ميت ميتين
أو واد بحدف كراسي ويفرقع البلالين
السياسة مش نجاسة أو خباثة
أوبتلفيق في الكلام
ولا هي في الحقيقة وبق فاضي والسلام
السياسة مش مؤامرة
وخلي خصمك تحت ضغطك
واوعى يوم يعرف يجيب للناس هدف
السياسة مش في قنوات عايزة تكسب من خناقنا
مش في كرافتات بتلمع لون دمائنا
السياسة مش فكرسي أو فمدفع
آآآآه يا خلق ..والله أتخنقنا
و فين عقولكم
ناس بتبني وناس تهد الى اتبنى
احنا باردك ناس بتفهم مش همل
وكنا فاكرينكم أمل
كنا بنقول أن مصر لو تنادي
تلقى ميت مليون أسد
السياسة عبادة زيها زي الصلاة
السياسة أنك تناقش الفكر بأدب
وانك تشوف الشعب ليه مابيختاركش
وأنك تدور على الحقيقة في الشوارع بالعمل
وأنك تصارحني بدخيلة السر الدفين
أنا مش عبيط ولا عويل
ولا اني قاصر أو خبل
رغم أني صابر كالجبل
أنا أصلي مصري
داري بللحكايات كلها
وشفنا ياما زيها
وجذورنا في الارض العتيقة
ليها ميت مليون سنة
ليها ميت مليون سنة
